متلازمة الأخ الأوسط
يا أم نياظي قبل ما تصحي نياظي علشان يعرف إن ضبش حرامي لازم تقولي له إن الأخ الأوسط في أي مكان وأي زمان دايما مظلوم .. الابن البكري أول فرحة وأول إحساس بالأبوة والأمومة، علشان كدة هيعيش طول عمره مميز أو له وضع خاص في قلب الأب والأم ولو حلفوا على الميه تجمد إنهم بيحبوا الولاد كلهم زي بعض متصدقش، أما بقي القرد الصغير أخر العنقود فله دائما وعلى مر كل العصور واختلاف كل الطبقات والألوان معزة خاصة " يرجى التشديد على حرف الزاي لتقرأ معزة خاصة بمعني محبة خاصة، وليست معزة أي أنثى الجدي أو التيس" جدا فهو أخر العنقود، يعني لازم يدلع، ومحدش يرفض له طلب وبيفضل كده لآخر العمر حتى لو بقى عنده 60 سنة برضه يفضل الأخ الأصغر أما بقى الموكوس الذي كان حظه ونصيبه أن يولد في الفترة الزمنية ما بين البكري وأخر العنقود فحدث ولا حرج، الابن البكري أخد الفرحة كلها والزهوة بأول مولود والسبوع والعقيقة والحبايب يباركوا ويهنوا ويجيبوا هدايا وعمرهم ما ينسوه أبدا لأنه على الأقل اسمه مرتبط بأسم السيد الوالد فدائما أي صديق عندما يريد تبجيل صديقه فيقول له يا أبا فلان، أما المفعوص آخر العنقود فعلشان بيكون صغير في وسط أخواته الاثنين اللي أتولدوا قبله فدايما الأب والأم يخافوا عليه لأنه بيحاول يقلدهم وهما بيلعبوا ومرة يتخبط ومرة ويقع فيصعب عليهم فيحتضنوه ويفضل نفس الإحساس طول العمر الابن البكري أول الفرحة وأخر العنقود ضعيف ومظلوم إنما الموكوس اللي في النص ده مالوش أي أحاسيس، مع إنه هو اللي بينزل يشتري العيش وهو اللي دايما يسمع كلام أمه لما تكون عايزة تبعته يشتري حاجة بعد الأخ الكبير ما يبلطج ويقول أبعتي أي حد وطبعا أخر العنقود يزرزر ويتنطط ويرفض فما تلاقيش إلا الوسطاني يا عيني ... ولو فكر يرفض يلاقي صوت أجش جاي من أوضة النوم "اسمع الكلام وأنزل يا كلب" .. مش عارف ليه كده والله حرام .. دا حتى في ألوان الطيف أو ألوان قوس قزح تلاقي الكل حافظ أول لونيين وأخر لونيين والألوان اللي في النص ما بينهم محدش فاكرها .. فإذا كنت أخ أوسط فيجب عليك إعلان الثورة على كل الأوضاع قبل أن تقول أم نياظي لنياظي إنك مظلوم ومقهور.
ليست هناك تعليقات:
إرسال تعليق